​من محمد عيد القاطن بشبرا الخيمة..لأحمد ابراهيم القاطن بدير النحاس

لو قلنا ان المصيبة الأم في مصر حالياً هي قيمة الإنسان...نبقى قربنا جداً من التشخيص السليم..لكن الحقيقة ان مش هو ده بالظبط التشخيص السليم..
فعلاً الفرق بيننا وبين الدول المتحضرة ان الإنسان عندنا رخيص جدأً جداً جداً..وعندهم غالي جداً..
والغالبية الكاسحة من الكوارث اللي بتحصل كل يوم فى مصر راجعه للمصيبة الأم دي..ان المواطن العادي الضعيف اللى مابيتمتعش بأى حصانة ولا نفوذ ولا مسنود بمنصب ولا بعلاقات ولا بفلوس..أضعف في بلده من حشرة في أي دولة أوروبية..
.
لكن نخللى بالنا ان البلوى دي بتتفاقم بشكل مريع بمعدل يومي تقريباً..وبقت في العشر سنين الأخيرة أسوأ بمراحل مما قبلها..
في نفس الوقت..الدول الغربية المتحضرة..الإنسان خارج منظومتهم بيبقى رخيص أوي برضه..الدول اللي أبدعت في إرساء الحريات وحقوق الإنسان وقيمة البني أدم والحيوان والجماد والنبات..بتستعمر دول وبتدمر شعوب..وبتنهب حقوقهم..وبتساند الظلم والطغيان فيهم..وبتغمض عينها عن مذابح شنيعة خارج أراضيها...
.
اذن الفكرة مش بس في "قيمة الإنسان.."..
لا..التشخيص الدقيق هو "البيئة اللي بتقيم الإنسان"..

الإنسان العالمي رخيص بشدة عند دول الحضارة..طالما انه خارج حدودهم..لأن المنظومة العالمية الدولية "بيئة بترخص الإنسان"..مافيهاش ديموقراطية ولا حرية ولا حقوق ولا إنسانية ولا تحضر ولا رقي...
نفس الإنسان العالمي لما بيلتحق بأي شكل بدولة غربية..حتى لو لاجىء..حتى لو مهاجر غير شرعي..بتشمله مظلة الحقوق والحريات وبتزيد قيمته أضاعفاً مضاعفة..وبيبقى فرد غاااااالي جداً في المنظومة...
.
مصر بقى لها 10 سنين تقريباً بتربي بيئة فاشية بشعة..وقيمة "الأغيار" أو "الآخر"..بتتناسب عكسياً مع الفاشية والكراهية وإحتقار الآخر والتحريض ضده...
كلما زادت العدوانية تجاه "الأغيار" أو "الآخر" كلما رخصت قيمة الإنسان...
في 2010..دم خالد سعيد بقى حلال بدعوى "لفافة البانجو"..
في 2011..طلعت واحدة من اياهم تطالب بحرق كل اللي في ميدان التحرير...
وواحد تاني ادعى ان اللى في الميدان بيعملوا علاقات جنسية كاملة..
فيه ناس حرضوا ضد المسيحيين في مذبحة ماسبيرو وفرحوا فيهم...
لما اتوصف الأغيار انهم "خرفان"..
لما اتحرض ضد رابعه والنهضة...واترقص على الدم...
لما توالت المذابح والكوارث..
وفي كل مرة قطاع من الشعب بيحرض وبيرقص وبيهلل..وقطاع تاني بيعمل نفسه من بنها..
.
الكارثة الكبرى ان الناس فاكرين ان الفاشية والكراهية والتحريض ضد الآخر..هاتفضل في اتجاه واحد..وهاتفضل مقصورة على "الأغيار"..
لكن الحقيقة انك لما رخصت قيمة الأغيار..رخصت قيمة الإنسان في بلدك..أى إنسان وكل إنسان..بمن فيهم انت شخصيا..
ما انت مصيرك هاتختلف مع شخص فاشي زيك...كاره للآخر زيك..وساعتها الأقوى بقى هايهرسك..وببلاش..لأنك حطيت قاعدة: ان الآخر دمه مستباح..ومالوش تمن..والخلاص منه سهل وبدون عواقب...
.
لما يطلع رئيس يقول لك: احنا فقرا أوى..
وهانجوع...وماله..مانجوع...
ده بيرخص قيمة الإنسان..يجوع وماله..تتاخد فلوسه...يعاني ويضحي ويتحرم علشان نبني البلد (القصور والعاصمة الإدارية والعلمين الجديدة وأطول برج وأعرض كوبري والنهر الأخضر)..
كل دى أهداف عظيمة يرخص علشانها الإنسان..
شوية أسمنت وخرسانه بقوا أغلى من قيمة الانسان..وكمان ده بقى إنجاز.
لا واللي مش عاجبه= خاين وعميل = مستباح
..
قضية راجح والبنا جزء من نفس القضية..استسهال قتل "الآخر" مع ثقة ان مافيش تمن هايتدفع..
لما محمد عيد اتقتل علشان تمن التذكرة...كان أول اللى اتقال "دول باعة جائلين" = طبقة حقيرة مالهاش تمن (عند المتلقي)...
دول المفروض مدركين أهمية التذكرة..يعنى ادراكهم قيمة التذكرة والإصرار على عدم الدفع عقوبته عندهم الموت...هو ده تمنهم...
.
اللى بيبرر ويدافع النهارده ويستحل دم "الآخر"...بكره هايبقى ضحية في موقف تاني..وهايلاقي اللى يسترخصه...
ديتها يدخل مرغمأ في صراع مع خصم "تمنه أغلى"..
.
البيئة اللي بترخص قيمة الإنسان دى شاملة كل مناحي الحياة...من الكورة للفن للدين للسياسة لأحداث الحياة اليومية..
وعلى ذكر الفن...
تفتكروا طبعا فيلم "حياة أو موت" بتاع "أحمد ابراهيم القاطن في دير النحاس"..
الفيلم ده اللى ممكن يبدو لنا ساذج حاليا..لكنه كان جزء من بيئة بتعلي قيمة الإنسان..
رغم المبالغات فيه..لكنه صور الدولة كلها بكل أجهزتها وامكانياتها..والمواطنين كلهم بيتكاتفوا علشان ينقذوا حياة شخص واحد...ده بيسيب أُثر في المتلقي عن قيمة المواطن...المخرج كمال الشيخ الله يرحمه كان له أفلام أكثر نضجا في نفس الإتجاه: ميرامار..اللص والكلاب..على من نطلق الرصاص..
صلاح أبو سيف كان له: بداية ونهاية والبداية والمواطن مصري..
عاطف الطيب كان له: سواق الأوتوبيس والبرىء وضد الحكومة...
.
هات لى فيلم واحد في العشر سنين الأخيرة ينفع يتحط مع الأفلام دي..
.
الخلاصة اني عايز أقول ان الموضوع بيئة متكاملة وكله مفوت على بعضه...
ومحاولة الحل بإجراء واحد أو التعامل مع قضية واحدة بشكل منفصل ده لا مؤاخذه قصور في الفكر وفقر في الرؤية...
الحل ييجي بتغيير البيئة كلها من فوقها لتحتها تغيير جذري..
ايوه..الدواء فيه سم قاتل وانت شربته خلاص..شربته يوم ما رخصت قيمة خصمك..ونزعت عنه حقوقه الإنسانية لمجرد انك بتكرهه..أو لأنه "الآخر"..
وانت نفسك قيمتك مش هاتعلى ومش هاتغلى ومش هاتتمتع بأبسط حقوقك ومش هاتقدر تحمي نفسك مستقبلاً من مصير اسود..ألا لما انت بنفسك وعن طيب خاطر تدي الحقوق دي للآخر ده..وتحميه وماترضالوش الإهانة والإستباحة والوجع والظلم..زي أي مجتمع محترم..
​