مختارات من الموقع
|
|
|
|
أخذ الحق صنعة..شباب أطباء بريطانيا
20/8/2020
 علشان نتعرف على اللي بيحصل في أماكن تانية من العالم.. النهارده شباب الأطباء في انجلترا صوتوا لصالح القيام بإضراب هو الأول من 40 سنة.. الإضراب 24 ساعة ولا يشمل خدمات الطوارىء يوم 1 ديسمبر...وإضراب كامل يشمل الطوارىء أيضا من 8 صباحا ل5 مساءا يومي 8 و16 ديسمبر (أثناء ساعات العمل العادية..علشان الدكاترة الكبار يشيلوا الطوارىء في اليومين دول)... وأعلنوا ده من دلوقتى..علشان المستشفيات ترتب أمورها قبل الإضراب بوقت كافي.. التصويت شارك فيه 76% من شباب الأطباء..(37 ألف طبيب)..و98% منهم وافقوا على الإضراب.. اللى نظم الإستفتاء وهايقود الإضراب الBMA (الإتحاد الطبي البريطاني)...أو نقابة الأطباء هناك.. وده كل وظيفته انه يدافع عن حقوق الأطباء.. فيه مؤسسات أخرى بتقوم بالتعليم الطبي ومشاريع العلاج ومشاريع الإغاثة وتسجيل الأطباء ومراقبة أداءهم ومحاسبتهم والمصايف والامتحانات والمعارض...ده مش شغل نقابات...المفروض يعني.. الإضراب ده مرحلة جديدة بعد فشل مفاوضات مستمرة من سنتين مع الحكومة.. والحكاية ابتدت لما الحكومة أعلنت في 2012 انها هاتعمل تعاقدات جديدة مع شباب الأطباء ابتداءا من أغسطس 2016.. الأطباء شافوا ان العقود دي مش عادلة للدكاترة ومش آمنة للمرضى..فالطرفين كلفوا جهة محايدة انها تحكم..الجهة المحايدة دى عبارة عن مجلس من خبراء طبيين وقانونيين ومحاسبين وممثلين للمرضى وغيرهم..قرروا انهم يدرسوا الموضوع سنة..وخلال السنة دي سمعوا كل الأطراف..ودرسوا العقود المماثلة فى الدول الأخرى..وتبحروا في عواقب كل الخيارات والتنظيمات والقوانين اللي بتحكم العمل عموما والعمل الطبي خصوصا.. بناءا على توصيات المجلس ده..الحكومة قدمت عرض بعقد جديد الشهر ده.. العقد ده ماعجبش الأطباء..لأنه مابيراعيش مطالبهم التالية: - مايتحددش ميعاد اجبارى لبدء تنفيذ العقد من غير موافقتهم.. - ماحدش يشتغل عدد ساعات زيادة عن المعقول بشكل يأثر على أداء الدكاترة.. - ماتتسحبش أى مزايا عن الموجود حاليا.. - اللى يضطر يشتغل ساعات زيادة ياخد زيادة مناسبة في الأجر.. - الشغل يوم السبت والحد له حساب مخصوص.. - مافيش شغل زيادة ببلاش تحت أى ظرف.. - اللى تشتغل نصف الوقت أو تاخد اجازة بسبب الوضع أو رعاية الأبناء لا تعامل معاملة أقل.. العقود الجديدة كان المفروض هاتتنفذ فى بريطانيا كلها..لكن نتيجة للقلق ده اسكتلندا وويلز وايرلندا تراجعوا..وقالوا: مش هاننفذ أى عقود جديدة الا لما الأطباء يبقوا راضيين عنها.. والحكومة الإنجليزية لسه مصممة تمشى فى الموضوع.. اللطيف في الموضوع 3 أمور: 1- ان الحكومة حبت تحرض كبار الأطباء والكليات الملكية اللي بتدرب الأطباء وتمنحهم الشهادات وجمعيات حقوق المرضى والمجلس الطبي العام اللى بيعاقب الأطباء لما يغلطوا علشان يضغطوا على شباب الأطباء انهم يتراجعوا..خاصة وان كبار الأطباء هم اللى هايشيلوا الطين أثناء الإضراب..والمرضى ممكن يتضرروا..لكن كبار الأطباء وجمعيات المرضى والكليات الملكية والمجلس الطبي رفضوا يتدخلوا..وقالوا ان الأطباء من حقهم يضربوا عاااااااااااااااادي...علشان ياخدوا حقوقهم.. 2- انه لما ابتدى القلق فى 2012..شباب الأطباء ساعتها كانوا عارفين انه على ما تيجي 2016..هايكونوا كبروا والموضوع مش هايضرهم..لكن هايضر الدفعات التالية..ومع ذلك أصروا انهم يخوضوا معركة هاتضرهم وتفيد غيرهم...وتجنبها كان هاينفعهم ويضر غيرهم..ومع ذلك كملوا...وماشتروش دماغهم.. مش بس كده..فيه ناس هايضربوا الشهر الجاي وتتخصم لهم فلوس في الأيام اللى هايضربوا فيها..رغم ان العقود مش هاتتطبق عليهم.. وبالتالى الدفعات الجديدة اللى هاتتضرر فعلا دخلت حياتها العملية والقضية مثارة على أشدها بالفعل علشانهم..وماكانوش مضطرين يبتدوا معركة منتهية ومحسومة ضدهم..لو كانت العقود أقرت من 2013..وساعتها ماكانوش هايقدروا يعترضوا.. 3- ان الحكومة ابتدت تحرض الشعب على الأطباء..وانهم ماعندهمش ضمير وطماعين..ومش حاسين بمعاناة المرضى..اللي هايموتوا نتيجة أنانية الأطباء....فالإتحاد الطبي جهز مجموعة كبيرة من الفيديوهات وموقع مخصوص وسلسلة من المظاهرات على مدى الشهور اللى فاتت..قلب من خلالها الطرابيزة على الحكومة وشرح للعامة ان العقود الجديدة دى هى اللى هاتضر المرضى وانهم مضطرين يتصدوا للموضوع ده علشان مصالح المواطنين فى رعاية طبية آمنة مش هاتتحقق إلا لما الدكاترة يشتغلوا بشكل لائق.. وانهم عملوا الترتيبات اللازمة ان الرعاية بتاعتهم ماتتأثرش فى فترة الإضراب..وانه لو حصل تقصير يبقى نتيجة ان الحكومة ماعملتش بالترتيبات دي.. والنتيجة ان أحدث استطلاعات الرأى أظهرت ان 74% من الشعب مع إضراب الأطباء.. ___________________________ الموقع اللى بيشرحوا فيه كل حاجه عن الإضراب http://bma.org.uk/…/ddrb-recommendations-analysis-f…/ia-faq… الفيديوهات https://www.youtube.com/watch?v=jK9cj8H31VA http://www.independent.co.uk/…/nhs-junior-doctors-have-over… https://www.youtube.com/watch?v=f6FakZfJsgQ http://www.bbc.com/news/health-34859860 https://www.youtube.com/watch?v=UHv9-3i6wBg https://www.youtube.com/watch?v=XKDegzweOeg http://www.telegraph.co.uk/…/12000618/junior-doctors-nhs-st… |
