مختارات من الموقع
|
|
|
|
التمييز ومعنى الوطنية
21/8/2020
 غلاف العدد الجديد من مجلة التايم الأشهر في أمريكا ماعليهوش صورة براد بيت وانجلينا جولي..ولا جنيفر انيستون.. عليه صورة كولين كيبرنيك..نجم كرة القدم الأمريكية... مش لأنه فاز ببطولة أو أحرز هدف تاريخي..ولا بمناسبة اعتزاله.. لأ.. لأنه بدل ما يقف احتراما للسلام الوطني الأمريكي..قرر أنه يقعد على ركبة واحدة..فى حركة احتجاجية على قتل الشرطة للسود هناك...والتمييز ضدهم... حركة كيبرنيك انتشرت..الأول قعد جنبه زميله فى الفريق اريك ريد... الواحد بقى اتنين..والاتنين بقوا تلاتة..والتلاتة عشرة..وبعدين فرق كاملة..حتى فى المدارس الأمريكية.. ومازالت الحركة بتنتشر..في الأول كان السود والملونين بس اللى بيقعدوا..لكن ابتدى كتير من زملائهم البيض يشاركوهم.. ___________________________ كيبرنيك قال: "أنا مش هاقف افتخاراً بعلم دولة بتظلم الملونين.. الموضوع بالنسبة لى أكبر من كرة القدم..وهابقى أناني لو عملت نفسى مش شايف وبصيت الناحية التانية.. فيه جثث في الشوارع..وفيه قتلة ماحدش بيحاسبهم على جرايمهم.. لما البلد دى تتغير وأحس ان العلم الأمريكي بيمثل لي اللى المفروض يمثله..وان البلد دى بتعامل كل مواطنيها بالشكل اللائق هاقف للسلام الوطني.." تلقى تهديدات بالقتل فكان رده: لو نفذوا تهديداتهم يبقى ده أكبر اثبات لموقفى من اللي بيحصل فى البلد دى.. ___________________________ البعض شبهوا موقف كيبرنيك بموقف محمد على التاريخي من حرب فيتنام فى الستينات.. وبشكل عام...حصل انقسام في الرأى العام الأمريكي بخصوص موقف كيبرنيك وزمايله.. ************ المؤيدين قالوا: - شىء مؤسف ان شاب عنده 28 سنة يعلم الكبار والقادة في الأمة دي معاني العدل والحرية وتوحيد الشعب.. - احنا ليه بنعتبر انه مش وطنى لأنه عمل كده..وبنعتبر اللى بيلفوا نفسهم بالعلم ويعملوا أعمال غير أخلاقية وطنيين ؟!! هى الفكرة فى قماش العلم ولا فى المبادىء اللى بيمثلها العلم ؟؟!! - الحقيقة ان كيبرنيك مش ضد الولاء للعلم..هو بينفذ حرفيا آخر 3 كلمات في نص قسم الولاء: "أقسم بالولاء لعلم الولايات المتحدة الأمريكية..وللجمهورية التى يمثلها العلم..أمة واحدة تحت الرب..موحدة..وتنعم بالحرية والعدل للجميع.." ************ فيه ناس محايدين قالوا: احنا مش موافقين على اللى بيعمله..بس من حقه يعمله من غير ما حد يخونه.. ************ المضحك بقى والظريف هو تعليقات "الدولجية الأمريكان"...اللى نسخ طبق الأصل من البلاوى اللى عندنا.. وسبحان الله...السياسيين منهم هم أشد مؤيدى السيسي هناك... اللى ضد كيبرنيك وزملاءه قالوا حرفيا: # خللى أمك تروح تحرس الحدود...(سيبك من الكورة..وروح البس زى الشرطة وانزل اقف في الشارع زيهم وحارب المجرمين واتعرض للى بيتعرضوا له).. # مش عاجباك البلد دى وعلمها وسلامها..غور منها وروح شوف لك بلد تانية تعيش فيها... (دونالد ترامب) # الكبيرة بقى جت من عضو الكونجرس ستيف كينج: اللى بيقعدوا أثناء السلام الجمهورى دول إخوان.."متعاطفين مع داعش"... :) ومن الجدير بالذكر ان ستيف كينج ده ضيف مستديم على السيسي في مصر..لدرجة انه مرة وفد من الكونجرس جه مصر وماخدوهوش..فصمم ييجى معاهم على حسابه وقال: "يجب أن نقف خلف الرئيس السيسي بكل قوة لأنه يمثل أتاتورك العصر الحالي للإسلام على مستوى العالم.." _____________________ ومازال الجدل مستمراً...علشان كده طلع غلاف التايم..بصورة كيبرنيك وعنوان بيدور حوالين التمييز ومعنى الوطنية.. هل الوطن مجرد مقدسات جامده حتى لو استولت على مقدراته فئة معينة..واحتكرتها..وانت مطالب ترضخ للى يقرروه..يا اما تبقى خاين ؟ ولا الوطن قيم ومبادىء وحقوق وشعور بالإنتماء..وولاءك لرموزه مرتبط بتحقيق كل ده ؟ _____________________ مصادر ومعلومات إضافية: ________________ https://www.alaraby.co.uk/…/%D9%82%D8%B3%D9%85-%D8%A3%D9%85… http://time.com/…/45039…/october-3rd-2016-vol-188-no-13-u-s/ https://mic.com/…/why-are-athletes-kneeling-during-the-nati… http://www.huffingtonpost.com/…/colin-kaepernick-time-cover… http://www.breitbart.com/…/rep-steve-king-travels-to-egypt…/ |
